一路發嘥氣

港府新一輪紓困措施涉資168億上星期出台。 先唔講內容, 光從字面睇, 當奴的心意已經好清晰, 香港一路發, 大家一路發!

普遍的焦點都放在一般紓解民生問題上, 我當然亦都抵唔住頸要指指點點, 其中最令我不滿的是政府建議增撥10億元予「中小企業市場推廣基金」。

我本身就職於中小企, 我真係唔知道政府到底將基金用咗去邊? 又係唔係如政府所講對中小企有咁大幫助? 我估計政府多數會把大部分基金撥至貿易發展局, 用作對外宣傳或展覽用途。但過往貿易發展局他們做事究竟幾咁有heart, 我多多少少都能夠體會得到。讓我試舉一些事例:

[事例一]
為開發新興市場, 前年貿易發展局安排一眾香港製衣業廠家到俄羅斯擺展覽, 據聞只得小貓幾隻黎睇, 甚至有些廠家在幾日的展覽期內連一張買家名片都攞唔到, 有些廠家更大叫貿易發展局回水, 可想而知貿易發展局的安排幾咁失敗。其實各廠家唔多唔少都會知道, 透過展覽而搵到新客的機會有時真係都幾講運氣, 但就連一張名片都攞唔到, 可謂聞所未聞。試問貿易發展局在開發新市場的同時, 有無詳細地評估過那些新興市場的發展潛力呢? 講真, 在新興市場要搵新客源並不難, 最令人頭痛的是客戶的誠信問題, 即是收唔收到錢這個最簡單的問題!

[事例二]
貿易發展局最近又有新思維, 就是用我們納稅人的錢去資助海外買家機票連酒店來港參觀展覽會, 主要係以新興市場買家為重點推廣。從一般客觀角度去睇, 那些買家連買張機票來香港參觀展覽的意欲都無, 我會質疑他們對這些展覽的興趣又有幾大? 又或者唔能夠負擔從自己的腰包裡掏出一萬幾千元旅費的買家, 又何來有錢同廠家買貨呢?

[事例三]
為求用盡所有政府資助, 年初又撥2千大元的中小企推廣現金券給予擺展覽的廠家, 資助廠家在貿發局旗下的雜誌登廣告, 唔好玩啦! 他們旗下的雜誌已經無晒以前的江湖地位, 今時今日本雜誌都無人睇! 搵廣告商談何容易, 其實美其名為推廣, 既可以刺激自己的廣告銷路, 且順理成章咁話俾人聽支援中小企。

[事例四]
資助中小企參展商租用參展場地的費用, 已經是董建華年代的產物, 現在又再把上限提高。經過咁多年的資助後, 我仲未睇到這些資助對中小企有咩成效, 其實只係白費心機, 浪費資源去養肥貿易發展局這類政府資助機構。

我時常懷疑高坐象牙塔內, 攞緊十幾萬月薪的官員對市場究竟有幾多認識, 他們最叻是坐在辦公室分析市場數據, 他們主要關心的是每次展覽的參展商數目能否創新高, 入場參觀人次能否創新高, 為了"做好呢份工", 除了送機票送酒店外, 還有送紀念品給入場的"國內買家", 送ASIAMILES積分給入場人士等。他們忽略了重點, 中小企需要係開發有潛力有質素的新客, 而並不是想盡一切辦法去谷大個入場人次。